الخميس، 19 مارس 2009

ادفع لكي تحصل علي البركه



صباح الخير قبل اي حاجه .... اه الكلمه مش عشان انا بصبح عليكم .... لا الكلمه دي كل الموظفين بيقولوها وبرده مش عشان بيحبوا الناس ولا حتي عاوزين يصبحوا عليهم .... الموضوع ببساطه أدفع لكي تحصل علي البركه أنا رحت أعمل الفيش الجنائي من حوالي 6 شهور عشان الجيش دخلت طابور طويل عريض مستني دوري زي اي حد انا اه كان ورايا 50 واحد بس برده كنت بعتبر نفسي الاخير لاني ادامي اكتر من 100 ...

عادي يا عم مدقش هنمشي هنمشي مهي المشكله ان كل واحد بياخد علي الاقل 5 دقايق .. المهم مش مشكله الوقت المكشله اني بقيت الاخير بجدايه ده حصل ازاي وفين ال 50 واحد ... للاسف ال 50 واحد كلهم مشيوا بس مشيوا بعد مخلصوا مصلحتهم .. يسلام طب ازاي ... هرجع واقولك تاني أدفع لكي تحصل علي البركه بصراحه دفعت وحصلت علي البركه ...

سبحان الله لقيت نفسي من الاخير للأول وأتاري الموضوع سهل مش هياخد دقيقه اساسا لدلاجه اني خلصت ومشيت وصاحبي واقف التاني في الطابور ولسه واقف ويمكن لو رحتله النهارده هلاقيه لسه واقف عشان احنا بنطبق قانون محلك سر

المهم دخلت الاوضه الموعوده وخلاص هعمل الفيش وأتاري انا اخدت نص البركه بس وفهمت طبعا لما لقيت الموظف المسئول بيقولي صباح الخير دفعت تاني وحصلت علي البركه كامله ... يا فرج الله

ياعم اسمعني بس وخليك معايا متهش مني انا رحت من يومين اعمل واحد تاني وقلت مش هدفع وهشوف اذا كنت هحصل علي البركه من غير مدفع ولا لا ... أأأأأأأأأأأأأه يا رجلي ... 3 ساعات واقف في طابور محلك سر واخيرا وصلت للاوضه الملعونه اقصد الموعوده لما وصلت هناك قولت الحمد لله الموضوع مشي من غير مدفع..أتاري الموضوع صباح الخير وعلي الفور رحت مطلع من جيبي فلوس وحطيت ايدي في جيب الراجل عشان احط الفلوس وخرجت ايدي من جيبه بالفلوس لاني حلفت اني مش هدفع وهاخد البركه وطبعا الحركه دي دخلت عليه

نفسي نفسي نفسي احصل علي البركه من غير مدفع

ليست هناك تعليقات:

إرسال تعليق